
فعلاً دقائق وجاء داخل غرفته لقى زينة قاعدة، عاين ليها باستغراب.
مجد: مالكم؟
زينة: مجد أنا مش أختك.
مجد: أهاا؟
زينة ببسمة: عاوزاك تتصرف وتطلعني من هنا، عايزة أجيب هدية لي عيد زواجنا.
مجد: يختي ليث ده رجلو في رجلك، قبل ما تمشي حتلقي هو جاهز ومنتظرك، عليك الله أنا شايف تسالي دير شنو بس.
زينة: مجد ساعدني عليك الله بس ما حنتأخر.
مجد باستسلام لنظرات أخته: أمري لله، البسي نازلي لحدي ما نمشي نشوف ليث ومالك.
فعلاً مجد وزينة نزلو الحديقة لقوهم كلهم مجتمعين مع عدا في ومويد.
زينة ببسمة: صباح الخير.
كلهم ببسمة: صباح النور.
مجد لي ليث ومالك: عاينو أنا حاطلع مع زينة ونازلي مشوار.
ليث باستغراب: طالعين وين؟
مجد: حاجة تخص نازلي وكنا محتاجيين زينة تكون معانا.
ليث: طيب حاجي معاكم طبعاً ما حسيب زينة.
مجد: لا يا ليث معلش بس زينة براها عشان حاجة حساسة.
ليث: لكن.
مجد بهظار: شنو يا ليوث، حتخاف على أختي مني؟ ما أكيد حدافع عنها، ما حيحصل ليها أي شي إن شاء الله.
ليث عاين ليه سكت، هو ما بحب زينة تطلع بدونه حتى لو الزول ده أخوها، وكان داير يطلعه حتة.
زينة مشت حضنتو: شنو يا ليييوث، هي كلها تلاتة ساعات إن شاء الله.
سحر بغيظ: بت يا زينة أنا ما ربيتك كدا.
ود باستسلام منها وختت راسها في كتف زيين البعاين في تلفونو وما شغال بالدنيا.
ليث باستسلام: طيب يا مجد ما تتأخرو رجاء.
مالك بهدو: ساعتك وأداتك معاك يا مجد.
مجد: حاضر ما تخافو.
زينة ببسمة شقت وشها وحضنت ليث عليها بشكررر، وليث ابتسم على بسمته، وقامت مشت بحماس لي نازلي.
ليث لي مجد: مجد حاول ما تتأخرو لأني سايق زينة حتة برضو.
مجد بغمز ليه: ما تخاف يا برو ما بنتأخرر.
ودخل ليث قام مشى غرفتهم لقاها بتتجهز عشان تطلع، عاين ليها بقلق، ما بحب تطلع بدونو حتى لو مع مجد، ما بحبها تغيب عن عينو حتى لو خمسة دقايق.
زينة قبلت لقتو شارد فيها، ابتسمت وهي عارفة بفكر في شنو، مشت ليه عاينت ليه بابتسامة.
ليث: في داعي ما تمشي أو تسوقوني معاكم.
زينة ببسمة: ليث حبيبي، انت لي ما مرتاح حتى مع وجود مجد؟
ليث: مجد ده صحبي وأخوي وبأمنو حياتي كلها، بس ما بحب تبعدي عني ثانية يا زينة.
زينة وهي بتضمو عليها: ما تخاف ليث، ما حنتأخر والله حنحاول نجي بسرعة طيب.
ليث وهو بضمها عليه ولسه في قلق، ما خوف إنه مجد ما حيقدر يحميها، لا، خوف إنه تبعد عنه، عنه دي براها مخيفة.
قطع لحظتهم صوت الباب وصوت مجد.
مجد: يلا يا زينو عشان ما نتأخر.
زينة: حاضر.
باست ليث في خدو وطلعت، وليث حصنها واستودعه ربه، نزلت لقت مجد ونازلي منتظرنها، ونازلي كانت لابسة فستان أبيض وفوقيه جكت جينز أغمق من حقها وعاملة شعرها كيرلي، وشايفة مجد بعاين ليها بغيظ شكله ما حابيها تطلع كدا.
زيينة بغمزة: أوه ناز المحاكية.
نازلي بغمزة برضو: صحبتي وأحاكيك مالو.
زينة ضحكت ومسكت يدها وطلعو تحت أنظار مجد المغيوظ من نازلي ولبسها المطلعاها جميلة جمال، طلعو واتحركو ومشو المول، وأول شي محل الساعات غالي كدا، واختارت ساعة عجبتو شديد، وفي محل الساعات برضو في ريحة اختارت ليه أفخم ريييحه.
وبعداك مشو محل لي محل صور، اختارت أحلى صورة ليهم، ابتسمت لي الصورة واتزكرت يوم عرسها.
Flash back
كانت بتعاين لي روحها فالمراية بتوتر بفستانها الأبيض المنفوش وشعرها العملتو كيرلي وميكابها السمبل، عاينت لي نفسها بإعجاب وكانت جمييلة حقيقي، كانت بت يحسد على جمالها.
نازلي بوراها بدموع: أخييراً يا زيينه، أخييراً حنرتاح منك وتعرسي.
زينة بضحك: حبيبتي حأعرس ليكي مجد عشان تجي تسكني جنبي.
نازلي بضحك: انتي بس عرسيني لأخوك، ما عندي مشكلة أسكن فيي حوش.
زينة: عاين الكلبة.
نازلي انفجرت من الضحك، قطع لحظتهم صوت بوري العربات، زينة مشاعرها اتخلبطت سعادة توترررر، نازلي طلعت خلته عشان راجلها يقدر يخش، دقائق جاء هو بطلتو كان طالع سمممح سماححه، زينة عاينت ليه بحب، أما هو انصدم من جمالها، كان جميييله جمال أكتر من العادة.
ليث: عايني أنا لو خطفتك عادي يعني مالك وأخوانك ما بقتلوني؟
زينة انفجرت ضحك فييه وسكتت من الخجل بسبب نظرات ليث.
ليث وهو ببوس راسها: أخيييراً يا زينة يا بت مالك بقيتي حقتي براي، ما حسمح لزول يقرب منك حتى أخوانك.
زينة ببسمة حب: طول حياتي ما كنت عاوزه أعرس ولا أحب، كنت مركزة في قرايتي بس، لكن انت جييت وغيرت كل شي في حياتي يا لييث.
ليث خت جبهتتو في جبهتته، ما قادر يصدق إنه حقته خلاص، خرب لحظتهم ضرب الباب وصوت مجد.
مجد: يلا يا عرسان الضيوف منتظرين يعني.
ليث بغيظ: مجد ده زي سحر واحد، أسي فرقو شنو منها.
زينة انفقعت ضحك منه، ليث عاين ليها وغمز ليها ومسك يدها ونزلو تحت أنظار الكل الفرحانين بيهم، ونور البتبكي في حضن مالك بسعادة، وزيين الدموعو نزلت على تومتو، ومجد دموعو نزلت على أخته الصغيرة وبدعي ربنا يديم ليها سعادتها.
رقصو سلو، بعداك بدت الرقصة، الكل جو بقو يرقصو وكانو الخاطفين الأنظار، ود وزيين كان برقصو بطريقة حلوة، فجأة كلهم حسسو بورود بتنزل فيهم وسمعو صوت ليث بتكلم وبعترف لي زينة قدامهم.
ليث بحب: أنا ما خجلان إني أعترف إني بحبك يا زيينه يا بت مالك.
زينة دموعها نزلت وبقت تضحك فيه، وانقضت ليلتهم بسعادة.
Back
زينة.
زينة استوعبت وعاينت لي مجد البعاين ليها بقلق.
مجد: لي ساعة بناديك، كويسة انتي؟
زينة ابتسمت: أيوا.
نازلي ببسمة: يلا الصورة خلصت.
زينة عاينت لي الصورة بإعجاب عجبتها، الراجل غلفه ليهم.
مجد: ارح ناكل قبل ما نرجع البيت.
زينة ونازلي عاينو ليه بحماس ووافقو، مشو المطعم طلبو كل ما يشتهو وقعدو ياكلو تحت تشغيلات مجد لي نازلي البتخجل وزينة البتضحك عليهم.
خلصو الأكل وبعداك رجعو البيت، مجد دخل الهدية في الضهرية بتاعه العربية بتاع ليث، وجاهم ودخلو، زينة حضنت مجد.
زينة بحب: شكراً ليك يا أحلى أخ، لولاك ما كنت حأعرف أعمل شنو.
مجد ببسمة وحب: حبيبتي، الله يديم سعادتك ويديمك لينا يا مزتي انتي.
نازلي عاينت ليهم بحب، دخلو البيت سلمو عليهم كلهم، زينة طلعت غرفته لقت ليث بصلي، وبعد خلص حضنتو في ضهرو.
زينة: وحشتنيي ليييث.
ليث بحب: وانتي أكتررر يا روح وقلب وحياه ليث انتي، أها مرقتك بدوني كانت كييف.
زينة ضحكت فيه: كانت ما حلوة بدونك، أي شي بدونك ما حلو ليث.
ليث ابتسم ليها.
ليث: يلا اجهزي لي وجهزي ليكي لبسة لي بكره وبجامة لأنو عندي ليك مفاجأة.
زينة: مفاجأة.
ليث بحب: أيوا يا قلب، يلا عشان نتحرك.
زينة ابتسمت بحماس وقامت بدت تتجهز، وليث براقب فيها بحب ومستعد يعمل كل شي عشان يشوف الابتسامة دي في وشها.
خلصت توضيب حاجاتها وعاينت لي ليث لقتو سرحان فيها، زينة ضحكت فيه.
زينة: خلصت.
ليث ببسمة: طيب البسي جكت فوق ده لأنو الجو بارد.
زينة: حاضر.
فعلاً مشت لبست ليها جكت، نزلو ودعو فالبيت تحت مشاكستهم، لكن كلهم دعو ليهم ربنا يديم سعادتهم يارب.
دخل غرفتو لقاها قاعدة وسرحانة، زيين عاين ليها بحزن، ما عارف لي هي بتسرح الأيام دي كتير، قرر لازم يتفاهم معاه، مشى ليها لقاها شائلة التلفون، شالو منها براحة وقعد في الأرض، وود عاينت ليه باستغراب.
زين: من متين بتخبي عني يا ود؟
ود عاينت ليه بعدم فهم.
زين: انتي قايلاني ما شايفك وانتي بتسرحي كتير يا ود، في شنو؟
ود عاينت ليه بحزن: أنا بس كنت بشوف الاجتماع بتاع الصيادلة النفسي، امشي من زمان بس.
زين: ولي ما وريتيني نمشي؟
ود بحزن: لأنو انت مشغول ف أمور البيت والحماية وما حبيت أزيده عليك، ما مشكلة بصبر لي السنة الجاية.
زين: ود حبيبتي انتي، أنا عارف إنه نفسك تمشي الاجتماع ده بس ما كنت عارف بتين، لي ما وريتيني، لي كتمتيها في نفسك، أنا عارف موضوع الحماية والبيت ده ما سبب.
ود: أنا خايفة إنو يعاينو لي نظام جديدة وإني ما اشتغلت بشهادتي.
زين حضنه عليه وهو عارف البتمر بيه، اجتماع الصيدلة النفسها كان تمشي عشان توريه نفسها وإنه يعرفو جهدها وإنه تساعد الناس المحتاجة، ده كان حلمها من زمان، وأسي بسبب البحصل ما قادر يحقق ليها ده.
ود نامت بدون ما تحس، وزين حس بيها نامت، شال براحة ختها في السرير، بقى يعاين ليها بحزن، وبعداك طلع من الغرفة بحزن شديد إنه ما قادر يحقق ليها حلمها تزور الاجتماع ده.
كانه فالطريق، زينة حسست بالملل، عاينت لي ليث البعاين في الطريق وماسك يدها.
زينة: نحن ليث ماشين وين؟
ليث ببسمة: حسي حتعرفي، حبيبي عارف الطريق طوييل بس قربنا.
زينة ابتسمت ليه وقعدت، وبعد دقايق طويل وصلو لي عمارة كدا فخمة، عاينت ليه باستغراب، ليث ابتسم ليها وقال ليها اصبري، طلع من العربية وجاء فتح ليها الباب ومد ليها يدو.
ليث بحب: اتفضلي أميرتي.
زينة ابتسمت ليه بحب ومسكت يدو وطلعت من العربية وهو أمن العربية، ودخلو عمارة فخمة، كان أصانصيرها برضو فخم، دخلو، وليث وقبل ما يدخلو الشقة زينة عاينت ليه باستغراب.
زينة: ليث انت بتخوني؟
ليث عاين ليها بغباء: بخونك؟
زينة بغيظ: دي شقتك صح، خاتي فيها مرتك أو حبيبتك وجاي تعترف بغلطك صح.
ليث بصدمة عاين ليها: زينة حبيبتي بتقولي في شنو.
زينة بغيظ: لا ما تتكلم يا أستاذ يا محترم، حكلم ليك مالك.
ليث بصدمة: طيب أنا عملت شنو يا بت المجنونة انتي.
زيينة بتشهق بصدمة: بتنبذ أمييي؟
ليث بغيظ: زيييينه الله يهدينا ويهديك، خشي وشوفي براكي.
زينة عاينت ليه بغيظ ومشت لي الشقة وعملت بشعرها حركة التعجرف، أما ليث عاين ليها بغيظ ومشى فتح ليها الباب، وقبل ما تخش وقفه.
ليث: دقيقة.
وطلع ليها البغمضو بيها العيون.
ليث بحب: زينو اقلعي جزمتك وخليني أربط ليكي ده.
زينة باستغراب لكن نفزت ليه ديره، ليث خته ليها البغمضو ليها العيون في عيونها.
زينة باستغراب: كان ممكن أغمض ليكي عيني.
ليث ببسمة: اسمعي كلامي زينو وحتعرفي.
زينة ابتسمت وعملت القالو، قلعت جزمته وليث لبسه الغماضة ومسك يدها، زينة حست بملمس غريب أول ما دخلت البيت.
