منوعات

قصة بنت الاسود

وقبل ما يتكلم أو يتم كلامه كانت في ضربة بتخترق صدرو تحديداً قلبو معلنة عن موتو.

دايمون بملل: كلامك كتير.

وبعداك عاين ليه نبيلة الكانت ما حاسة بحاجة.

دايمون: افرحي إنك ما حتحسي بموتك يختي.

وضربه ضربة في راسها واتأكد بتوقف النبض بتاعهم، يعني ماتو، واتحرك بكل هدو وزي ما دخل زي ما طلع وركب عربيتو بهدو وعاين لي المزرعة بخبث.

دايمون بخبث وهمس: تو تو، حتعيشو أسوأ أيامكم يا أسود، الحصل في زينة دي بس البداية لي اللعبة الانتو ما قدرها.

وأشر لي السواق يتحرك، وفعلاً اتحرك بهدو.

طلعت من غرفة زينة بتعب حاسة روحه مرهقة شديد، اتحركت لجهة الحمامات تغسل وشها، أثناء ما هي ماشة شافت زول مقنع ولابس أسود في أسود وبعاين باتجاه غرفة زينة، استغربت وعاينت ليه لحدي ما هو انتبه ورجع لي ورا.

نازلي استغربت إنه ده منو، فجأة حست بيد بتتخت في كتفه، قبلت لقتو مالك الكان بعاين نفس الاتجاه الكانت بتعاين ليه.

نازلي: شوفتو؟

مالك وهو بهز ليها راسه: خشي الحمام سرعة، أنا منتظرك هنا.

نازلي هزت راسها ودخلت، ومالك عاين لي مكان الراجل الكان هنا وشكوكو بدت تزيد، فجأة سمع صوت زين بوراه.

زين: أبوي ليث صحى.

مالك: طيب جاي، منتظر نازلي تطلع.

زين عاين ليه باستغراب وهز راسه ورجع، أما نازلي طلعت ومالك ابتسم ليها واتحركو لي غرفة ليث، دخلو لقوهم كلهم قاعدين.

مالك وهو بقرب منو وبعاين ليها وبطمن عليه.

مالك بحنان: انت كويس يا ليث؟

ليث بتعب وهز ليه راسه: أنا كويس بس عايز أشوف زينة.

مالك: انت ارتاح شوية، زينة كويسة ما تخاف، وهي في الغرفة الجنبك.

ليث عاين ليه وهز راسه، والكل كان بعاينو لي مالك ومجد وزين وهم شايفنهم ساكتين، وبعد دقايق من السكوت.

مالك بهدو: زين ومجد ومويد وحسام، سوقو العائلة وارجعو البيت، أنا حأفضل مع ليث وزينة.

زين برفض: لا يا أبوي انت امشي ارتاح وأنا حأقعد معاهم.

مالك: لا لا لازم أقعد، أنا في زول مراقب هنا بالمستشفى، أنا ونازلي شوفناه.

مجد عاين ليه ولي نازلي بصدمة الكانت بتعاين لي مالك بهدو.

مالك بهدو: وبعدين ما ينفع نخلي سامر ونبيلة براهم كتير، وبعدين انتو تعبتو.

نور برفض: لا أنا عايزة أقعد.

مالك: نور رجاء.

مالك بتفكير في الحيحصل، لازم يبدأ يأمن عائلتو بعد ده قبل ما يعمل أي خطوة اتجاه دايمون.

ليث وهو بعاين لي السقف: دايمون هو سبب الحادث ده.

كلهم عاينو ليه ومالك ومجد وزين عيونهم قلبت لي غضب.

مالك بغضب شديد: كنت عارف إنه الحقير ده ليه يد فالموضوع، حيندم، ما حخلي يعيش حياته.

ليث عاين ليه وحكاء ليهم الحصل في الحادث كله.

مجد بسخرية: خاسر تلاتة عربات عشان حادث.

زين بجدية: الإنسان ده بقى خطير، لازم نرجع المزرعة يا مالك.

حسام بجدية: أي يا مالك، الموضوع بقى أكعب من قبل.

مالك عاين ليهم وسكت، ما عارف يعمل شنو ولا يودي عائلتو وين، خايف يرجعهم لي المختبر برضو حيكون عارفو، لكن على الأقل المختبر آمن من غيرو.

مالك بجدية: أول ما زينة وليث يطلعو حنرجع المختبر.

زين: مختبر مجد؟

مالك هز راسه: ده المكان الوحيد الآمن، وما بقدر يخش براحتو، بس أسي مجد حتأمن المختبر وبزيادة، حالياً ما عايز أي محل في المختبر أو البيت المحروق يكون ما متأمن، الكاميرات ترجعهم وتتأكد إنه دايمون ده ما خاتي كاميرات.

مجد: طيب.

مالك: والبنات حتفضلو كلكم مع بعض، ما عايز واحدة تكون براها لحدي ما راجلها يجي، وحيكون القاعد كالعادة حسام ومويد حيامنو عليكم.

ليث بهدو: ونحن؟

مالك بغموض: حنبدأ نتخلص من اللعبة دي عشانه طولت شديد، ودايمون طول فالحياه دي.

كلهم عاينو لي مالك بخوف وكلهم خايفين من الأيام الجاية، وكلهم بفكرو بتين حيعيشو حياتهم بدون خوف.

ليث: يعني حنمشي المختبر بتين؟

مالك: أول ما زينة تصحى ونطمن عليها.

نور بحزن: تتوقعو شك الدكتور ده يطلع صح.

مالك غمض عيونو بوجع على بتو، كلهم عاينو لي نور وما في واحد اتكلم.

مالك: يلا اتحركو ووروني الحصل معاك.

كلهم بعد إصرار من مالك رجعو مع مجد وزين البيت، ومالك قعد مع ليث.

ليث شايف الحيرة في عيون مالك: ما تخاف يا مالك، هانت هانت، كل شي حيرجع زي ما كان.

مالك بتعب: إن شاء الله، حامشي أسي أقعد مع زينة عشان ما تكون براها، حتكون كويس براك؟

ليث ببسمة وهظار: شنو يا مالك أنا دراجون.

مالك ضحك فيه وطلع، وليث عاين لي الباب بحزن وغمض عيونو بوجع بحاول يطمن روحو إنه زينة كويسة وما سابتو.

ليث بتعب: يارب انت أعلم بحالتنا يارب ساعدنا.

رجعو كلهم لي البيت والسكوت عندهم، كل زول دخل غرفتو، مويد عاين لي مجد وزين.

مويد: أنا حامشي أشوف أهلي وأجي.

مجد: حجي معاك.

مويد هز ليه راسه ونزلو الاتنين البادروم، وكانت الصدمة إنه سامر ونبيلة مضروبين، مويد عاين لي أهلو بصدمة ومجد ما أقل صدمة منو، مجد مشى بسرعة يفحص نبضهم لقاهم الاتنين ماتو.

مجد بصدمة: ماتو الاتنين.

مويد حس الدنيا لفت بيه، مهما كان ديل أهلو، من الصدمة رجلو ما قدرت تشيلو وقع ف الأرض وهو بعاين لي جثامين أهلو بصدمة، أما مجد شفق عليه وجرا ليه وضماهو، ومويد ما اتكلم، ما بكاء ما صراخ، بس بعاين في جثامينهم بصدمة.

كيف؟ متين؟ وهو قبل ما يطلعو كانو عايشين، مويد حس بدموعو بتنزل، مسحه بسرعة، ما داير يبكي عشانهم، ما داير يبكي عشان ناس كانو بعتمدو على موت ناس عشان قروش.

مجد عاين ليه بحزن ونفسه يعرف اليوم ده ما داير ينتهي على خير لي الناس كلها، مويد هز راسه وطلع تحت أنظار مجد الحزينة عليه، مجد طلع تلفونو ورسل رسايل وبعداك اتصل بزول عشان يجي الجثامين دي وطلع من البادروم هو زاتو ومصدوم.

أخدت دش بتعب وعاينت لي شعرها المبلول وطويل، كسلت تستشورو، كانت عطشانة وحتموت من العطش، نزلت تحت، وأثناء ما هي نازلة شافتو هو بمنظر وقف قلبها، أما هو اتحرك على الجنينه تحت صدمته، ومن ملامحو جرت بوراهو بخوف.

في بخوف: مويد انت كويس.

أما هو ما قبل ما اتكلم بقى ماشي، في عاينت ليه بخوف من شكلو ومشت بوراه لحدي ما لقتو قعد فالجنينه وكان بعاين فالسماء، في مشت قعدت جنبو وعاينت ليه بكل خوف.

في: انت كويس مويد؟

مويد دموعو نزلت، خلعت في: ماتو.

في بصدمة: منو الماتو؟

مويد بدموع: أهلي ماتو، أهلي الخاينين ماتو، في ماتو قبل ما يتوبو، ماتو وهم مجرمين.

في عاينت ليه بصدمة، كيف ماتو ومتين، وده السؤال نفسه الراود مويد.

في بصدمة: كيييف.

مويد بدموع: دايمون الحقير استغل إننا ما في البيت وقتلهم، ما عارف أعصب ولا أحزن، أعصب عشان هو قتل أهلي، ولا أحزن على نفسي إنه كان عندي أهل زي ديل.

في عاينت ليه بحزن، منظرو كسر قلبها، ما بتحب تشوفو كدا، ما عرفت تواسيه كيف، كان نفسها تضمو عليها وتقول ليه إنه هي معاهو، بس بأي حق وبأي أساس؟

في بحزن: ما عارفة أقول ليك شنو يا مويد، بس لخير، ايمكن لو ما دايمون قتلهم ايمكن كانو ماتو بطريقة أسوأ.

مويد بعجز: أنا أنا حاسي إني ما كان لازم أسلمهم لي مالك، حاسي إنه.

في قاطعتو: بالعكس، إنه سلمتهم لي مالك قبل فوات الأوان دي كانت أحسن فكرة، تخيل لو كان عايشين ومحررين كانو حيقتلو كم نفر على سبيل عيشتهم، عارفة ديل أهلك يا مويد وعارفة الموضوع موجع بالنسبة ليك، لكن ما تبكي ولا تزعل نفسك، لأنه مهما كان ومهما حصل ولو كانو عايشين كان حيكتب ليهم بالقتل فالسجن لأنو جرائمهم اتخطت الحدود.

مويد عاين ليها بحزن وقلبه واجعة، ما عارف يحس بالغضب ولا حزن، فجأة حس بيد بتتخت في يدو، رفع راسه لقاها في عاينت ليه ببسمة.

في ببسمة: الموضوع صعب تتخطاهو لكن أنا حاكون معاك لو عايز، ما حخليك في محنتك دي يا مويد، كل ما تحس نفسك داير تتكلم مع زول ناديني وأنا مستعدة أسمعك.

مويد حس قلبو حيقف من كمية المشاعر الجاتو، غير المشاعر السلبية لي مشاعر ملخبطبة من لمسته، وفي كانت متوترة ولمسته وترتها زيادة، حست روحها مشاعره كلها اتخلبطت وحتتفضح.

في بخجل حاولت تخبي بس مويد لمحه وابتسم: أنا حامشي بعد ده، وما تنسى ولا تقلق، انت ادعي ليهم بأنو ربهم يسامحهم.

وكانت عايزة تمشي بس حست بيد وهي بتمسك بي يدها، قبلت ليه وعاينت ليه، وهو عاين ليها ببسمة ومسك يدها وباسه مساااافة، وبعداك فكاها وقام وهمس ليها في عضانها: تصبحي على خير يا امييرتي.

ومشى وخلاها مصدومة من كلامه حقيقي، أما هو كان مبسوط في قدرتو تخلي يطلع من إحساس زنب أهله رغم إنه هو لسه حزين، فالنهاية ديل أهلهم.

أما في عاينت لي الطريق المشى بيه بصدمة وعاينت ليه يدها الباسه فيها ببسمة وحب: وانت من أهل الخير يا فارس أحلامي.

مرة أربعة يوم من وقت الحادث وزينة ما صحت، وخلى الخوف بدخل جوا العائلة كلها، وكلهم عرفو بموت سامر ونبيلة وانصدمو.

صحو الصباح، نور نزلت بحزن بتها الما عايزة تصحى دي، نزلت لقتهم كلهم قاعدين منتظرنها.

زين ببسمة يطمئن ليها أمه: جاهزة يا نونو.

نور ابتسمت ليه بحزن وهزت راسها، كلهم عاينو ليها بحزن وكلهم جواهم خوف على زينة، طلعو العربات وأخد منها الطريق ساعة لحدي ما يوصلو المستشفى، نزلو بحزن زي كل يوم في الأربعة أيام الفاتو، مشو غرفة زينة لقو ليث ومالك كالعادة قاعدين معاها.

مجد: أها ما في أخبار الدكتور ما قال شي.

ليث بخوف وقلق: لا، هو زاته ما عارف لي هي ما صحت لحدي أسي.

سحر: ما تخافو إن شاء الله بتصحى.

نور بحزن: إن شاء الله.

كلهم قعدو براقبو زينة النائمة، دي مالك عاين لي عائلتو كلهم.

مالك بجدية: خلونا نتكلم بعد ده.

كلهم عاينو ليه.

مالك بجدية: زي ما عارفين سامر ونبيلة ماتو، وده يعناته سهولة دخول دايمون وطلوعو من المزرعة عادي، يعني الوضع ما أمان، وعشان كدا الليلة حنرجع كلنا المختبر، وزينة برضو، وود ما انتي حتعرفي تتصرفي صح لو لا قدر الله ساءت حالته.

ود: أيوا إن شاء الله.

مالك: حنعتمد عليك.

وعاين لي مجد الفهم نظرتو.

مجد بجدية: خلصت كل في في المختبر وعملت كل الأجهزة جديدة وشغلت الكمبيوتر ووصلت الإنذارات في ساعة كل واحد فينا عشان لو حصل حاجة نتصرف.

مالك هزء ليه راسه.

فتحت عيونها بتعب وتشوش وهي سامعة جوطة جنبها وناس بتتكلم، راسها كان تقيل بشكل، غمضت عيونها بوجع وهي حاسة بأشعة الشمس الفي غرفته، فتحت عيونها بتعب وعاينت ليه عائلتها الكلها متلمين جنبها وبتناقشو وما في زول فيهم منتبه ليها.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى