نور لمالك: مالك، سنتين هي ما قادرة تروق، سنتين يا مالك وأنا بشوف بتي بتعاني كدا لي بتين.
مالك عاين لي نور بحزن وضماها عليه وبقى يراقب في مجد وليث البعاينو لي زينة النايمة.
مالك دموع بتنزل وغضب: أقسم بالله الذي خلقني وما حأحلف بيه كذب، حضووقو عذاب نفس العذبو لي أولادي ما حخليه يتهنى بموتو.
ليث ومجد عاينو ليه وشايفين غضب مالك، ونور عاينت ليه.
مالك: ليث شيل مرتك وتعال، يا مجد افتح المختبر.
مجد: حاضر يا بابا.
ونزلو كلهم وبقو يعاينو لي مجد هبش الحيط، فجأة طلعت وحدة تحكم كتب الباسورد ولقى الباب اتفتح.
نور بصدمة: ده بتين عملتو.
مجد: أنا كنت بعملو وانتو نايمين، حتى بابا وليث اكتشفو قريب، ده كان مكانا أنا وزين، الله يرحمه.
ود عاينت ليه بحزن واتنهدت بتعب، ليث نزل براحة وهو شايل زينة وقلبو وعيونو عليها، ونزلو كلهم من بعدو، دخلو لقو زي الأوضة كدا فيها غرفة تحكم وفيها كم غرفة.
مجد: ليث ودي زينة لاول غرفة ديك عشان تكون قريبة من الكل.
ليث: طيب.
ومشى فعلاً، دخل وختاها في السرير، طلع لقى مجد ماسك الكمبيوتر الكبير وبعمل فيه حاجات.
ود بفضول: انت بتعمل في شنو يا مجد.
مجد: بفعل وضع الإنذار لو زول غريب جاء، وبفعل الكاميرات وبأمن في الأبواب.
نور: حسبي الله ونعم الوكيل.
نور اتحركت لي أي غرفة ترقد فيها، مالك لحقه طوالي.
مجد: خلصت.
مجد عاين لي مويد: مويد انت الحتراقب الدنيا دي كلها.
مويد: طيب.
مجد: عن إذنكم ماشي أجيب حاجة من فوق، وطلع دخل غرفته وعاين لي صورتها بحزن.
مجد بحزن وجع قلب: ما قادر أستحمل أكتر من كدا يا نازلي، ما قادر والله، أختي البتنهار علينا كل فترة وأخووي.
مجد دموعو نزلت، فجأة حس بيد بتتخت في كتفو، رفع راسه لقاه مالك ببتسم ليه حنان، ضماهو عليه.
مالك بحب: أوعدك يا مجد، أول ما نخلص من دايمون حنبدأ نفتش عنها، حتى لو بقى ده آخر شي أعملو في حياتي، أوعدك.
مجد ضماه أبوه، كان محتاجه بجد حقيقي، لولا كان انهار من زمان، نزلو تحت لقو ليث ومويد وحسام وسامر بتونسو، أما البنات ود وفي ونور وسحر بتونسو.
مالك: زينة ما صحت.
ليث بتعب: لا لسه.
مالك بحزن: طيب امشي ارتاحو لأنو حنتحرك بليل.
ليث ومجد: طيب.
ودخل بعد أشر لي نور إنه تجي، وسحر سكتت أول مرة ما تهظر أو تقول ليهم يقليلن أدب، وود قامت برضو، وفي كانت بتعاين لي مويد وما مصدقة حيكون قاعدين مع بعض، مضت ساعات وما في زول عارف حيحصل شنو.
صحت من النوم لقت ود قاعدة قدامها.
زينة: ود؟
ود رفعت راسها من التلفون: زينة صحييتي؟
زينة: وين ليث؟
ود: طلعو قبل شوية.
زينة همهت ليها وقامت، اكتشفت دي ما غرفتها، عاينت بتعب، دخلت الحمام استحمت وصلت عملت شعرها ضفيرة وطلعت سلمت عليهم كلهم.
نور بقلق: زينة كويسة انتي.
زينة: أيوا يا ماما ما تخافي.
سلمت عليهم وقعدت تتونس مع (في) وود.
كانو قاعدين التلاتة وكل زول فوق شجرة، كان الوضع كالاتي: ليث براقب الجهة الغربية ومجد الشرقية ومالك من قدام، كانو براقبو عن كثب، فجأة سمعو صوت مجد في سمعاتهم.
مجد: أخش أحاول أكشف من جوا؟
مالك: لا ارجع العربية، أنا حأخش وأفتح ليك الكاميرا (كانت كاميرا صغيرة في البدلة بتاعتو).
وليث يقعد في مكانو.
مجد وليث: طيب.
مالك بقى يراقب في الوضع وكان عايز يمشي بس شاف دايمون بطلع ومعاه بت جاريها جر وما في زول قادر يشوف وش البت بسبب الطاقية الهي لابسها والقناع الفي وشها.
ليث اتكلم: حقير وبتاع بنات.
مالك ببرود: خلينا من البت وطير الكاميرا الصغيرة في العربية عشان نعرف موقعهم.
ليث: طيب.
وفعلاً شغل الكاميرا وخلاها تطير واتثبتت بالعجلات بتاع العربية.
ليث: تم.
مالك: انت امشي مع مجد وراقبو ماشي وين.
ليث فعلاً نفذ كلام مالك ومشى العربية الكان قاعد فيها مجد، مالك نزل بدون ما يشوفه الحراس وهو اتعلم كيف يتسلل، عمره كله كان بمشي وكل ما بشوف كاميرا بعطله من خلاص ساعتو لحدي ما وصل قدام غرفة دايمون وشاف كمية رجال واقفين قدام غرفته، ابتسم بسخرية فتح السماعة بصوت واطي.
مالك: دراجون شتتهم.
ليث بخبث: أمرك يا شيطان.
كانو قاعدين في الطريق، هي كانت بتعاين في يدها الحرفياً مليانة ضرب، قعدت سنتين بتتعزب فيهم وما في زول جاء ينقذها ولا حتى فارس أحلامها وزوجها.
: نازلي.
رفعت نازلي عيونها لي الراجل الكريه.
مسك يدها وضغطه بقوة لمن طلعت صوت موجوع.
دايمون بشر: أنا لمن أتكلم معاكي تردي.
نازلي وهي بتعاين ليه بشر والطاقية الفي راسها وقعت وأظهرت شعرها الكثيف وعيونها العسلية ورموشها الكثيفة، رغم الضرب الفي وشها كانت جميلة جمال.
نازلي بقوة مزيفة: ما عايزة أرد عليك، لو عايز تضربني فضربني لأنو اتعودت على ضربك يا دايمون.
فجأة حسست بكف في خدها، لا بكت لا دموعها نزلت ولا صرخت، لأنها ببساطة اتعودت وبقى من روتينها اليومي.
دايمون بشر: نازلييي اتقي شري.
نازلي عاينت ليه بقوة: ما عايزة أتقي شرك يا دايييمون.
دايمون ابتسم ليها وجرر شعرها الكثيف، عاين ليها بشر.
دايمون: عقابك اليوم وعقابي المفضل، نازلي عيون وشها بهتت وهي حاسة بيدو بتمشي في جسمها بطريقة مقرفة.
نازلي ببكاء: خلاص خلاص أنا أسفة.
دايمون ضحك فيها ضحك وسابها وعاين ليها بخبث.
دايمون: بحبك لمن تسمعي كلامي يا نازلي، وأسي حتلبسي الفستان ده وحتجي معي.
نازلي هزت ليها راسها بطاعة وقبلت على الشباك وأطلقت لدموعها العنان.
ثواني ومالك سمع صوت ضرب، ابتسم بخبث وهو سامع كلمات الراجل.
: الأســـــــــود هاجــــــــموووا.
وبقو بجرو، وحتى الرجال الكانو حارسين غرفة دايمون مشو، مالك ابتسم بسخرية من ضعف قواته، دخل الغرفة وبقى يفتش فيها لحدي ما لقى باب سري.
مالك بجدية: زيتريكس سامعني.
مجد بجدية: أيوا يا شيطان.
مالك وهو بفتح ليه الكاميرا: شوف لي كلمة السر بسرعة.
مجد: طيب دقايق.
ومجد اشتغل مسافة حتى ادا مالك كلمة السر، مالك نزل ولقى في غرفة معاناة في البادروم واستغرب من ده، ومشى لي الأداة الكان قاعد في الطربيزة.
مالك بخبث طلع سائل معين كباهو في الأداة واتأكد إنه الأداة ما اشتغلت، وطلع بعد رجع الأداة مكانو وطلع، وزي ما جاء زي ما طلع، دقايق وشاف الجنود رجعو، ابتسم بسخرية وطلع بعد ما اتأكد مسح كل شي واتحرك بسرعة لي العربية.
مجد: أها يا مالك.
مالك ببسمة: الجهاز خرب وما حقدر يعمل غيرو جديد.
ليث بضحك: دايمون ده عامل فيها زكي.
مالك بتعب: يلا ارح يا مجد.
مجد فعلاً اتحرك بهدو، مالك اتزكر.
مالك: صحي عرفت وين العربية ماشة.
مجد بجدية: مشو لي حفل في شركتو الوهمية ديك.
مالك بسخرية وعاين لي الطريق، وليث ما كان شغال بي أي زول وكان بفكر بي بس إنه نفسه يسوق زينة ويبعد بيها عن الكل بس تخلص موضوع دايمون ده.
أخد الطريق منهم ساعة لحدي ما وصلو حتة كدا، سلمو عربيتهم وغيرو ملامح وظهرو وشهم الحقيقي، بعدين بدلو بي عربية تانية خوفاً من إنه أتباع دايمون يتبعهم.
مجد بتعب: نفسي أنووم.